2006-12-03

Хийсвэр ертөнцийн иргэд нэмэгдсээр...

Интернэтэд оршин тогтнох хийсвэр ертөнц Second Life Америкт ид шуугиан тарьж буй. Уг сайтын хэрэглэгчид виртуал ертөнцөд өөрийгөө төлөөлөх "хүнэнцэр"-ийг бүртгүүлээд, концерт үзэж, наймаа хийж, байшин барьж, баяжиж болно.

Энэ ертөнц аль хэдийн сая гаруй оршин суугчтай болсон тул томоохон зах зээл болж, компаниудын хараанд аль хэдийн өртжээ.
Ниссан компани тэнд томоохон эзэмшил газартай болоод, өөрийн машинуудаа зарж, сурталчилж, унаж үзэх боломж олгож байна. Нэгэн зочид буудал тэнд шинэ зочид буудал бариад, хэрэглэгчдийнхээ саналыг авч сайжруулсаар, түүнтэйгээ яг адилхан загвартай барилга бодит ертөнцөд барьсан байна.

Тэр ч байтугай дуучин Бен Фолдс өөрийгөө "хувилаад", хийсвэр ертөнцөд концерт тоглон мөнгө "хүүдийлсэн" гэнэ лээ.

Энэ ертөнцийн мөнгөний нэгж нь Линден доллар (300 линден доллар нь нэг америк доллартай тэнцэнэ). Тэнд олсон орлогоороо амьдралаа залгуулаад явах сүйхээтнүүд ч гараад ирсэн тул татварын асуудал ч босч, одоо хууль болох шатандаа яваа юм байна.

Өөрөөр хэлбэл, виртуал ертөнцөд эдийн засаг үүсээд, хөгжөөд эхэлчихжээ. Тун удахгүй бодит ертөнцийн эдийн засгийг виртуал ертөнцийнх давах нь ойлгомжтой. Тэгэхээр монголчууд минь, энэ хоосон орон зайг эртхэн эзэлж авсан нь улсын минь ирээдүйг гэрэлтэй болгоно гэж би бодном. Газраа ухаад баяждаггүйг Аргентин, Чили мэтийн улсууд харуулчихсан, харин бид хүндээ найдаж хөгжих ёстой. IT - Монголын ирээдүй юм аа.

Бодит ертөнцөд би царай муутай, цалин багатай байж болно. Цаана чинь "бурхан болоогүй" хэрнээ хоёр дахь амьдралаа эхлүүлэх боломж гарчихаад байна. Хоёр дахь "би" гайхалтай сайхан залуу болж төрөөд, баяжаад, намайгаа тэжээчих ч юм билүү. Хамгийн гол нь энэ бүхэн зүүд, солиорол биш ажгуу.

4 comments:

Anonymous said...

Дуусашгүй...

Buyantsogtoo, Ts. said...

Зоригчан оцүкарэ. Нээрээ би энэ секондлайф дээр нэг вээнчер компани байгуулдиймуу гэж бодоо л яваа юм. эсвэл БҮГДЭЭРЭЭ хамт байгуулдиймуу...гэсн.

Anonymous said...

Сонирхолтой юм.

Оюунбодол said...

iimerhuu yum baidag bh gej bodoj baisan, ali hediin garchijee te, sonirholtoi yum bichsen tnx,
good luck.