Хан-Уул дүүргийнхэн МАХН компанид ажилд орох нь

Орон нутгийн сонгууль удахгүй болох гэж байгаа. Хан-Уул дүүрэгт МАХН-аас нэр дэвшигчид "Өрх бүрт 30 сая" гэсэн уриатай оролцож байгаа. Түүнийг өрсөлдөгчид нь бүтэшгүй зүйл гэж үзэж буйгаа тайлбарласан. Харин МАХН-ынхан аль хармаанаасаа 30 саяыг гаргаж өгөхөө яаж тайлбарлах нь сонирхлыг минь татаж байтал өнөөдөр Ньюс.мн сайт дээр ашгүй гарчээ.

4 ам бүлтэй, эхнэр нөхөр хоёулаа ажил хийдэг дундаж айлын дундаж орлого сард 500 мянга байгаа юм байх. Тэгээд бодохоор жилд 6 саяын орлоготой. Дээрээс нь МАХН компанийг УИХ-ын сонгуульд ялуулсныхаа шанд хүн бүрийн орлого 4 жилийн дараа 4 дахин нэмэгдэх ёстой гэнэ. Тэгээд бодохоор 24 саятай болж байгаам байх. За тэгээд монгол хүн болж төрснийх, алтан дээр суусан гуйлгачин гэж дуудуулахаа болих ёстой болохоор "Эх орны хишиг" 1.5 сая төгрөгийг хүн бүр жил болгон авна гээд бодохоор 4 хүнтэй айлд 6 сая төгрөг нэмэгдэнэ.
Ингээд л "Өрх бүрт 30 сая" гэсэн хөтөлбөр биеллээ олно гэж байна цаана чинь...

Байз, бодоод үзсэн чинь бидний цалинг МАХН компаниас гаргадаг болж таараад байна уу даа? Тэгэхээр бид өөрсдийнхөө төлөө, улсынхаа төлөө биш МАХН-ын төлөө ажилладаг хүмүүс болчихсон юм болов уу? Тэд бидний цалинг өөрсдийнхөө арын халааснаас гаргадгаа битүүхэн сануулж, ИТХ-ын зөөлөн суудалд залж өгөхгүй бол цалинг маань тавьж өгөхөө болино гэж чимээгүйхэн сүрдүүлж буйгаас ялгаагүй эд байна энэ чинь.

Жич: Үүнийг биччихээд, ньюс.мн сайт дээрх холбогдох линкийг нь тавих гэсэн боловч хайгаад олсонгүй, бодвол интернэтээр аялагчид хялбархан тооцоо хийгээд зүгээр л молиго болохыг нь илрүүлээд байхаар, интернэт ухагчдыг хуурч чадахгүйгээ мэдээд, бантаад авчихав уу гэж таав...

Согтуу жолооч нарыг цөөрүүлэх нь

Согтуугаар машин жолоодох явдал Монголд нэлээн байдаг шинжтэй. Нэг найз нь машин барьж байхад хажуудах хүмүүс нь шахсаар байгаад уулгачихна, жаахан юм чинь мэдэгдэхгүй энэ тэр гэж байгаад л... Тэгээд осол гаргана, хүний амь нас, эрүүл мэндийг хохирооно. Аав минь авто ослоор нас барсан нь надад хүнд туссан, тэр машиныг барьж явсан залуу ч хүн дайрчихъя гэж бодоогүй нь лавтай. Тийм болохоор хувь хүмүүс зөвхөн өөрсдөө гэлтгүй, хамт яваа, машин барьж буй найз нартаа анхааруулж байцгаая гэж уриалмаар байгаа юм.

Яагаад өнөөдөр ингэж бичих болов гэхээр... Яг жилийн өмнө Японы зам тээврийн тухай хуульд өөрчлөлт орж согтуугаар машин жолоодсон хүний ялыг өмнөхөөсөө 2 дахин хүндрүүлснээс (Согтуу бол 5 хүртэлх жилээр хорих, сая хүртэлх иенээр торгох, халамцуу бол 3 хүртэлх жилээр хорих, 500 мянга хүртэлх иенээр торгох) гадна хамт явалцсан, хамт уулцсан, уух архийг нь худалдсан, машинаа унуулсан бүх хүмүүсийг хам хэрэгтэн гэж үзэж шийтгэх болсон юм. Энэ хууль хэрэгжиж эхлээд нэг жилийн хугацаа өнгөрөхөд согтуугаар машин жолоодож яваад баригдсан тохиолдол урьд өмнөхөөсөө эрс буурчээ. Хууль өөрчлөгдөхөөс өмнөх нэг жилд Фүкүока аймагт 2246 хэрэг гарч байсан нь өөрчлөлтийн дараах 1 жилд 1044 болтлоо буурсан байна.
Үүнтэй холбоотойгоор орлого нь багасч магадгүй болсон уушийн газрууд согтсон үйлчлүүлэгчээ өөрийн машинаар хүргэж өгөх, эсвэл такси дуудаж өгөх гэх мэт үйлчилгээ хүртэл үзүүлэх болсон байна.

Хамгийн гол нь хүмүүсийн сэтгэлгээнд өөрчлөлт орж эхэлсэн нь ажиглагдаж байгаа юм. Аз таарч осол гаргахгүй байлаа ч цагдаагийн хараанд өртвөл амьдралынхаа нэлээд хэдэн жилийг торны цаана өнгөрүүлэх болохоор тэр...

Ямар ч байсан хүмүүсийн сэтгэлгээ өөрчлөгдөж болох нь харагдаж байна. Монголчууд маань ч гэсэн машин барьж яваа нэгнээ архиар битгий шахаж байгаасай, дэлгүүрүүд нь орлогоо бодож машины жолоочид архи зарахаа болиосой.